A Federación Rural Galega-FRUGA e o Grupo de Desenvolvemento Rural de A Mariña, apostan pola eficiencia e o aforro enerxético no vacún de leite

Vense de celebrar un curso de “Eficiencia enerxética nas explotacións leiteiras galegas” organizado pola FRUGA e polo GDR de A Mariña en San Cosme de Barreiros, onde asistiron gandeiros de A Mariña de Lugo interesados no aforro enerxético nas súas explotacións. Alí púxose de manifesto que, na situación de crise económica en xeral e do agro galego en particular, o aforro en enerxía é xa unha prioridade na produción de leite.

A Mariña, 7 de novembro de 2011.- A tendencia alcista dos prezos enerxéticos e un factor cada vez máis relevante nos costes de producción, xa que diversos estudos estiman nun 8% o porcentaxe do gasto de electricidade no total dos custos fixos na producción de leite.

Ler mais

FRUGA AVOGA POR INCENTIVAR O COOPERATIVISMO AGRARIO COMO UNHA DAS MEDIDAS NECESARIAS PARA SAÍR DA CRISE

A Federación Rural Galega reúne máis de 150 persoas nas VI Xornadas Agrarias celebradas en Melide

Melide, 18 de decembro de 2010. A Federación Rural Galega organizou o venres 17 e o sábado 18 de decembro as VI Xornadas Agrarias Galegas, que congregaron a máis de 150 persoas do sector para debater sobre cooperativismo e produción agroforestal sostible en Galiza.

Logo do acto de inauguración, a cargo da alcaldesa de Melide, a nacionalista Socorro Cea, e dun percorrido polas conclusións das anteriores xornadas, ofrecido por Ramón Muñiz, que quixo asi entregar o relevo á FRUGA na organización dunhas xornadas que foron referencia para o mundo agrário galego nas últimas décadas. A continuación o presidente de FRUGA, Xurxo Álvarez, presentou os temas que se debateron durante este venres e sábado.

Así, na sección de leite analizáronse e comparáronse os custos de produción das explotacións estensivas e intensivas con diversos estudos de caso. Aquí interviñeron os técnicos Xan Pouliquén e Pablo Lúgaro, asi como os e as titulares das explotacións obxecto do debate.

Na sección de carne, os temas debatidos foron os custos de produción e manexo de explotacións da montaña luguesa, impartido por Eloi Villada, e a nova incorporación nunha explotación estensiva de carne con ampliación territorial na comarca do Deza, exposto por Iria Villar e Sandra Maneiro. Ademais, técnicos de Coren expuxeron o manexo e custo de explotación dun cebadeiro de vacún.

Xa o sábado, analizáronse os sistemas de produción leiteiro, nunha mesa na que interviñeron Antonio Oca, Bernardo Valdés e Pura Ferreño; a experiencia do Banco de Terras cun estudo de caso no concello de Trazo, ofrecido polos técnicos Xosé Carballido e Francisco Ónega e o gandeiro Xosé Rei Noia; os modelos asociativos de xestión e ordenación integral do monte, a cargo de Xosé Antonio Meixide, Xabier Bruña e Xesús Mazaira; e, por último, o futuro da PAC, a cargo de Edelmiro López e as portavoces parlamentares en materia agrária do BNG e do PSOE, Tereixa Paz e Sonia Verdes. Ao mesmo debate estaba convidado o grupo parlamentar do PP, que declinou participar.

Entre os colaboradores destas xornadas, organizadas por FRUGA e o Concello de Melide, figuran a Xunta de Galicia, a Deputación Provincial da Coruña, o Consello Regulador Arzúa-Ulloa, Feiraco, Leite Río-Leyma e o grupo Coren.

A organización das xornadas valora moi positivamente tanto a numerosa asistencia aos debates e exposicións, asi como as importantes achegas feitas no decorrer das mesmas. Ademais procederase en breve à edicións das mesmas en distintos formatos, tanto audiovisuais como impresos.

Máis de 150 labreg@s e técnicos seguiron con interese o decorrer das xornadas

VI XORNADAS AGRÁRIAS GALEGAS

Terán lugar en Melide, entre os dias 17 e 18 de decembro. FRUGA colle o relevo da iniciativa encetada polas I Xornadas Agrárias Galegas, celebradas na na Faculdade de Económicas da USC aló polo ano 1983.

Compostela, 9 de decembro de 2010.- O vindeiro dia 17 de decembro comezan en Melide as VI Xornadas Agrárias Galegas. O acto inaugural, que téra lugar às 17:00 horas, contará coa intervención de Socorro Cea, Alcaldesa de Melide, Ramón Muñiz de las Cuevas, primeiro coordenador destas xornadas, ademais de Xurxo Álvarez, presidente da FRUGA. Inmediatamente despois comezará o programa de traballo, coa conformación de dous grupos: un a respeito do leite, e outro sobre a produción de carne de vacún. O obxectivo é analisar pormenorizadamente modelos reais de explotacións de ambas orientacións (leiteria e cárnica) tanto desde o ponto de vista económico como técnico, correspondentes aos distintos modelos de explotación existentes na Galiza.

Xá o sábado inicia-se a xornada analisando globalmente distintos sistemas de produción de leite para logo abordar temas referentes à xestión do território (Banco de Terras), ordenamento e xestión do monte, ou o futuro da PAC.

Para finalizar as xornadas terá lugar unha mesa redonda coa participación dos distintos relatores e relatoras, asi como dos e das titulares das explotacións participantes das xornadas, correndo o encerramento das mesmas a cargo do coordenador  das IV Xornadas, Emilio López Pérez.

Gran número de ponentes de contrastado prestíxio no agro galego.

No trascorrer das xornadas participarán Gozalo Constenla, Xan Pouliquen, Olga Garcia Agra, Pablo Lúgaro Seco, Xosé Pedreira, Eloi Villada, Manuel Da Cal, Iria Villar, Sandra Maneiro, Xosé Rodriguez Cid, Xose Manuel Puga, Antonio Oca, Bernardo Valdês, Pura Ferreño, Xan Rodríguez, Xosé Carballido, Francisco Ónega, Alberte Blanco, Xosé A. Meixide, Xabier Bruña, Xesus Mazaira, Alberte Souto, Edelmiro López, José Manuel Silva, Gonzalo Flores e @s voceir@s de agricultura das tres organizacións políticas representadas no Parlamento Galego.

O programa completo das xornadas pode-se consultar aqui:  triptico xornadas agrárias .

A AFILIACIÓN DA COSTA DA MORTE VISITA A FACENDA ” O AGRO” EN CELANOVA

A visita forma parte do Curso de Agricultura e Gandeiria Ecolóxica celebrado en Cee. Ademais de visitar esta explotación de carne ecolóxica fixo-se unha breve parada na “Casa da Quenlla”, en Vila de Cruces, onde Pilar Vispo, titular da mesma, explicou o seu paso da agricultura convencional à ecolóxica.

Cee, 19 de novembro de 2010.- Na xornada de onte un nutrido grupo de gandeiros e gandeiras da Costa da Morte desprazou-se até Celanova para coñecer in situ a explotación de Roberto Álvarez, gandeiro pioneiro na intrudución na Galiza da raza Salers, de orixe francesa. Os e as cursillistas aproveitaron a visita tanto para coñecer unha raza que amosa grandes potencialidades para o aproveitamento do noso monte (grande rusticidade, boas aptitudes cárnicas,…) como para coñecer un entorno natural excepcional e unha experiéncia gandeira e comercial de grande interese para un sector marcado desde hai tempo por uns prezos estabilizados à baixa e suxeito a un constante aumento nos costes de produción.

Asi topamos uns animais robustos, capaces de sacar adiante crias con importantes pesos ao abtimento aproveitando tan só os recursos forraxeiros dos montes de Amoroce, xa perto da “raia” con Portugal. De feito, os animais abatidos ao redor dos 10-11 meses de vida deixan rendementos superiores aos 200 quilos de carne, tendo esta ademais excelentes cualidades organolépticas, aportadas tanto polas características da raza como polo manexo efectuado por Roberto nestas terras de Celanova.

Xa de volta às nosas casas, realizou-se unha parada en Camanzo para coñecer a Pilar Vispo, pioneira da Agricultura Ecolóxica nas beiras do Ulla, que relatou a sua experiéncia para animar a labregos e labregas a adoptar este tipo de práticas agrárias nun mercado que demanda cada vez mais produtos sans e de cualidade.

NOVO CURSO DA AGV-FRUGA EN ARBO

As actividades desenvolvéronse nas instalacións da Cooperativa Eidosela, de Arbo.

Xose Manuel González Vilas dá instrucións aos e às cursillistas antes de comezar unha sesión prática.

Arbo, 4 de Xuño de 2010.- No mes de abril a AGV-FRUGA, coa colaboración de FORGA-CIG, realizou un curso de 30 horas sobre Defensa Vexetal e Enxerta na Cooperativa Eidosela de Arbo. Ao curso asistiron mais de 25 persoas, a maioría socios da Cooperativa e na que se abordaron tanto cuestions relacionadas coa protección fitosanitaria (impartida por Xosé Manuel González Vilas) como a metodoloxía do enfoque integrado ou loita razoada, o enfoque ecolóxico, as familias de productos fitosanitarios e as suas precaucions a ter en conta.

Por parte de Francisco Rego acometeuse a explicación da enxerta e a sua posta en prática para que nunha maña de sábado soleada se fixeran varios enxertos en verde, que é a técnica mais apropiada para esta época do ano e que consiste en xuntar gromos herbaceos (verde) con patrón agromado. Os
responsables da Cooperativa realizaron un documentaio desta actividade, xa disponíbel en en “youtube” e que agardamos incorporar en breve a esta páxina..

Por parte de Vilas noutro sábado fíxose unha introducción prática á elaboración de defensivos naturais e biofertilizantes. Neste caso comenzouse a preparar maceración de ortiga e o Biofertilizante Supermagro,
este último deseñado no Sur do Brasil hai mais de 10 anos para fortalecer a resistencia a pragas de arbores froiteiras e horta. O preparado de ortiga é un bioestimulante moi coñecido que vai ben en moitos cultivos e que favorece as defensas naturais das plantas. Os biofertilizantes por via foliar reforzan o equilibrio metabólico interno e fan que a pragas teñan dificultades en xugar a saiva da videira xa que non atopará os compostos simples que son a verdadeira causa de moitas emfermidades vexetais.

Tanto os enxertos como os preparados serán testados para avaliar a eficacia das ensinanzas postas no curso.

Tras o curso se ofreceron uns petiscos con viños da Cooperativa como Albariño Eidosela 2008 e 2009 e o Arbastrum Condado (Albariño, Treixadura e Loureira).