A Federación Rural Galega-FRUGA, súmase á Folga Xeral do 27 de xaneiro.

Anima a toda a poboación do medio rural galego a participar nesta xornada de folga e nas mobilizacións que organiza a CIG.

Compostela, 17 de xaneiro do 2011.- A Confederación Intersindical Galega, CIG, ten convocada unha folga xeral na Galiza para o vindeiro 27 de xaneiro que pretende dar unha resposta aos ataques contra a clase traballadora promovidos dende o Goberno español, nomeadamente a reforma do sistema público de pensións, que ten como claro obxectivo dificultar o acceso ás mesmas e reducir a contía das pensións futuras. Dende a Federación Rural Galega, FRUGA, celebramos esta convocatoria xa que a consideramos oportuna e necesaria, e sumámonos a ela.

Esta reforma das pensións é totalmente inxusta, non existen razóns técnicas que a xustifiquen, nin hai posibilidade de quebra do sistema, nin nada ten que ver estas reformas coa situación de crise económica. O único obxectivo que se persegue con estas reformas e favorecer novamente os intereses dos grandes especuladores financeiros, verdadeiros responsábeis da situación de crise económica que estamos padecendo, e que son tamén os responsábeis da suba indiscriminada e especulativa dos cereais, dos alimentos e dos insumos necesarios para o funcionamento das nosas explotacións.

No mundo rural galego as pensións actualmente son das máis escasas do estado español e estas reformas incidirían dunha maneira aínda máis negativa nestas prestacións, reducindo máis as súas cuantías, obrigando a máis sacrificios para ter o dereito ao seu disfrute e dificultando o acceso a estes dereitos.

Dende a Federación Rural Galega, FRUGA, pensamos que a única maneira de frear estes ataques contra a maioría social é recorrer á mobilización social e por iso apoiamos esta convocatoria de Folga Xeral e animamos a toda a poboación do mundo rural galego a sumarse a esta xornada de folga e ás mobilizacións que convoca a Confederación Intersidical Galega, CIG.

FRUGA AVOGA POR INCENTIVAR O COOPERATIVISMO AGRARIO COMO UNHA DAS MEDIDAS NECESARIAS PARA SAÍR DA CRISE

A Federación Rural Galega reúne máis de 150 persoas nas VI Xornadas Agrarias celebradas en Melide

Melide, 18 de decembro de 2010. A Federación Rural Galega organizou o venres 17 e o sábado 18 de decembro as VI Xornadas Agrarias Galegas, que congregaron a máis de 150 persoas do sector para debater sobre cooperativismo e produción agroforestal sostible en Galiza.

Logo do acto de inauguración, a cargo da alcaldesa de Melide, a nacionalista Socorro Cea, e dun percorrido polas conclusións das anteriores xornadas, ofrecido por Ramón Muñiz, que quixo asi entregar o relevo á FRUGA na organización dunhas xornadas que foron referencia para o mundo agrário galego nas últimas décadas. A continuación o presidente de FRUGA, Xurxo Álvarez, presentou os temas que se debateron durante este venres e sábado.

Así, na sección de leite analizáronse e comparáronse os custos de produción das explotacións estensivas e intensivas con diversos estudos de caso. Aquí interviñeron os técnicos Xan Pouliquén e Pablo Lúgaro, asi como os e as titulares das explotacións obxecto do debate.

Na sección de carne, os temas debatidos foron os custos de produción e manexo de explotacións da montaña luguesa, impartido por Eloi Villada, e a nova incorporación nunha explotación estensiva de carne con ampliación territorial na comarca do Deza, exposto por Iria Villar e Sandra Maneiro. Ademais, técnicos de Coren expuxeron o manexo e custo de explotación dun cebadeiro de vacún.

Xa o sábado, analizáronse os sistemas de produción leiteiro, nunha mesa na que interviñeron Antonio Oca, Bernardo Valdés e Pura Ferreño; a experiencia do Banco de Terras cun estudo de caso no concello de Trazo, ofrecido polos técnicos Xosé Carballido e Francisco Ónega e o gandeiro Xosé Rei Noia; os modelos asociativos de xestión e ordenación integral do monte, a cargo de Xosé Antonio Meixide, Xabier Bruña e Xesús Mazaira; e, por último, o futuro da PAC, a cargo de Edelmiro López e as portavoces parlamentares en materia agrária do BNG e do PSOE, Tereixa Paz e Sonia Verdes. Ao mesmo debate estaba convidado o grupo parlamentar do PP, que declinou participar.

Entre os colaboradores destas xornadas, organizadas por FRUGA e o Concello de Melide, figuran a Xunta de Galicia, a Deputación Provincial da Coruña, o Consello Regulador Arzúa-Ulloa, Feiraco, Leite Río-Leyma e o grupo Coren.

A organización das xornadas valora moi positivamente tanto a numerosa asistencia aos debates e exposicións, asi como as importantes achegas feitas no decorrer das mesmas. Ademais procederase en breve à edicións das mesmas en distintos formatos, tanto audiovisuais como impresos.

Máis de 150 labreg@s e técnicos seguiron con interese o decorrer das xornadas

PRESENTADO O CONTENCIOSO CONTRA A DECLARACIÓN DA ZEPA DA LIMIA

Presentouse un extenso informe que desaconsella a declaración de Zona de Especial Proteción de Aves no emprazamento escollido pola Administración.

A Xunta segue sen querer escoitar as demandas das comunidades de regantes, que ven perigar o futuro da sua actividade.

Ourense, 16 de decembro de 2010.- O pasado día 3 de novembro Xurxo Álvarez Presidente da Federación Rural Galega, xunto con representantes das Comunidades de Regantes presentou en Ourense en rolda de prensa a Demanda por contencioso contra a decisión de decretar unha ZEPA na comarca limiá. No dito acto a Advogada Belén Rodríguez relatou as bases xurídicas en que se fundamenta  a demanda. Na mesma comparecencia pública o Enxeñeiro Agrónomo Xosé Manuel González Vilas expuxo as razóns técnicas, incluídas nun exhaustivo estudio, que desaconsellan a ZEPA polas súas graves consecuencias negativas sobre o desenvolvemento agrario e económico da agricultura na comarca.

A advogada sinalou que na argumentación do Decreto de ZEPA a  Xunta de Galiza apóiase en informes técnicos que non gardan a debida separación de imparcialidade ao evidenciarse que os que elaboran os informes forman parte das  organizacións conservacionistas que demandan a favor  da creación da ZEPA frente à consideración dunha alternativa baseada en outra localización xeográfica. Todo isto foi refrendado nun informe ornitolóxico que se adxunta á demanda presentada pola FRUGA.

Pola sua parte, Xosé Manuel González Vilas apuntou os danos económicos que se evidencian desde o momento en que entra en vigor o Decreto, como a posibel retirada dos investimentos públicos (que teñen financiamento europeo) sobre mellora e creación de novos regadíos sociais e que suman máis de 50 millóns de euros para case 5.000 Has, xa que nas ZEPAS xa decretadas noutros lugares se limita expresamente o uso da rega na agricultura. Toda vez que a ZEPA se desenvolva no Plan de Usos e Xestión as previsibles limitacións, regulacións e proibicións sobre os usos tradicionais agrarios na comarca serán un elemento máis que grave no delicado equilibrio de rendabilidade das explotacións da pataca.

ASINADO O CONVÉNIO DE COLABORACIÓN ENTRE FRUGA E CIG

Xurxo Álvarez e Suso Seixo, durante a sinatura do convénio.

Compostela, 20 de setembro de 2010.- O pasado venres 17 Xurxo Álvarez, Presidente da FRUGA, e Suso Seixo, Secretario Xeral da CIG, asinaron en Compostela o Convenio de Colaboración que formaliza as relacións entre a FRUGA e a CIG. Este acto celébrase logo de que os distintos órganos de governo das duas organización desen a sua aprovación a un texto que estabelece os eixos fundamentais nos que se teñen que dar as relacións entre duas organizacións irmás na defensa das clases traballadoras e populares da Galiza.

Asi, ambas as entidades contarán con delegacións nomeadas polos seus respectivos órganos de governo para executar o desenvolvimento deste convénio que recolle, entre outras cuestións, a necesidade de colaborar nos distintos procesos eleitorais que afecten a unha ou à outra organización, asi como o apoio nas distintas comarcas onde fora necesario o uso das distintas infraestructuras e servizos dos que unha ou outra puidera dispor.