Moito cambiaron as cousas por estos lares, hai 10 anos pouco máis de dunha media ducia de adegas tiraban desta Denominación, e nin Feira tiña, difícil era atopar algunha botella de Monterrei nas cartas da nosa hostalaría, aínda así non dubidabamos o máis mínimo do potencial que atesouraba a comarca tributaria do Támega e por tanto do Douro , por condicións, terras, saber facer, só se precisaba dun certo ánimo e para adiante. Na VI Feira do Viño xa se puido ver iso e como sempre se dí o mellor esta por chegar.
Non faltaron os clásicos como Ladairo e Gargalo, tamén houbo recen “chegados” como Adegas Tabú, Pazo Valdeconde, Tapias Mariñan,etc. As tendencias nas elaboracións asentan os viños polivarietais como brancos con Treixadura-Godello e en tintos Mencía-Tempranillo ou a Arauxa, que aínda precisa de máis arroupe e multiplicación para situar esta caste en primeira liña, desto teremos tempo de falar máis adiante. Sobre a previsión da vendima, en palabras de Cristobo Boo, Técnico, Viticultor e Elaborador do Fragas do Lecer comenta que vai ser moi complicada, con maduracións dispares entre parcelas e cepas, “a sequeira esta complicando todo”.
Tamén se aproveitou a Feira para presentar a Coordenadora da AGV en Monterrei, Purificación Caldelas, Enxeñeira Agrícola, natural de Castrelo de Val e que ten un amplio coñecemento destas terras, tamén non debemos esquecer o traballo de Amadeo Salgado, vocal do Consello Regulador da DO Monterrei e Afonso Fernández viticultor de Albarellos (Monterrei) que retornou da Xermania para plantar cepas na súa parroquia viñateira. Entre as previsións das actividades da AGV é realizar un curso de Cata en Outono e programar novas accións de apoio a proxección e comercialización das marcas da DO. Dicir finalmente que a asistencia de público foi fantástica, a pesares do calor arraiano houbo moito movemento xa desde o sábado a tarde, cando a inauguración, polo que se vé esta DO xa non é noviña e pode con orgullo ensinar o bó que ten e que temos de saborear entre todos/as. Tamén aproveitamos para colgar a ligazón no noso blog “Vinos de Monterrei” de Javier Rodríguez González.